Italiýanyň Prada moda öýi Şanhaýda Aziýadaky ilkinji restoranyny açar. Onuň konsepsiýasyny meşhur gonkongly režissýor Wong Karwaý işläp taýýarlady diýip, WWD habar berýär.
Mi Shang atly restoran Şanhaýyň merkezindäki dört gatly Rong Zhai aýratyn jaýynyň ikinji gatynda ýerleşer. Prada ony 2017-nji ýylda satyn alyp, abatlaýyş işlerini geçirdi. Restoranyň açylyşy 31-nji marta meýilleşdirilýär.
Mi Shang ady hytaý dilinden “heserli” diýlip terjime edilýär.
Interýeriň dizaýny Wong Karwaýyň “Söýgi şähdi” (Любовное настроение) we “Ýabany günler” (Дикие дни) ýaly filmlerinden ruhlandy. Bezegde onuň kinematografik stiline salgylanýan aýnalar we kontrastlar ulanyldy. Karwaý logotipi döretmekde tête-bêche usulyny, ýagny biri-birine ters öwrülen iki suratyň birleşmesini ulandy.
Menýuda ertirlik naharlary, esasy tagamlar, süýjülikler we kokteýller bar. Şef-aşpezler hytaý tagamynyň öwüşginleri bilen italýan aşhanasyna ünsi jemledi.
Kafe-restoran her gün 10:00-dan 22:00-a çenli açyk bolar.
Brendiň Karwaý bilen hyzmatdaşlygy geçen ýyl başlady, ol şonda Prada üçin “Gülleýän Şanhaý” (Цветущий Шанхай) serialynyň äheňinde kapsulalar kolleksiýasyny döretdi.
Bu Prada-nyň tanymal režissýorlar bilen ilkinji iş tejribesi däl: 2015-nji ýylda Ues Anderson kompaniýa üçin Milandaky Bar Luce-i taslap, 1950-60-njy ýyllaryň kafesiniň atmosferasyny döretdi.
