2025-nji ýylyň iýul aýyndan sentýabr aýy aralygynda Ýaponiýada dört esasy ugur boýunça Fudzi dagyna çykmak üçin 4000 ýena (takmynan, ABŞ-nyň 26 dollary) möçberinde töleg giriziler. Ozal töleg diňe Ýosida ýodasynda alynýardy we 2000 ýena barabardy diýip, The Japan Times gazeti habar berýär.
Tölegiň girizilmegi syýahatçylyk akymyny we wulkana ýetýän ekologiki zyýany azaltmaga gönükdirilendir. 2024-nji ýylda Fudzi dagyna 204 müňden, 2023-nji ýylda 221 müňden gowrak adam çykdy.
“200 müň syýahatçy – bu barybir köp. Ýaponiýada bary-ýogy iki aýda şunça adamy özüne çekjek başga dag ýok. Şol sebäpli olaryň howpsuzlygyny üpjün etmek üçin käbir çäklendirmeler zerur” – diýip, Sidzuoka prefekturasynyň administrasiýasyndan Nasuko Sodeýama belledi.
Fudzi Ýaponiýanyň iň esasy syýahatçylyk ýerleriniň biridir. Simmetrik konus görnüşli wulkan ýapon grawýuralarynyň, hususan-da, suratkeşler Hokusaýyň we Hirosigeniň ýygyndylarynda ebedileşdirildi.
Ýylyň köp böleginde dagyň depesi gar bilen örtülen, ýöne tomus möwsümi oňa baryp bolýar. Bu döwürde syýahatçylar Fudziniň eňňitlerinden Günüň dogşuny görmek üçin oňa çykmaga çalyşýar.
