2026-njy ýylda indiki, hasap boýunça 98-nji “Oskar” baýragynyň gowşurylyş dabarasyny ýene-de komik Konan O’Braýen alyp barar. Amerikan kinoakademiýasy çäräniň 15-nji martda Los-Anjelesdäki “Dolbi” teatrynda geçiriljekdigini yglan etdi diýip, Variety habar berýär.
O’Braýen özüniň gatnaşjakdygyny degişme bilen tassyklady.
“Meniň geljek ýyl “Oskary” alyp barmagymyň ýeke-täk sebäbi, men Edrien Brodiniň öz çykyşyny tamamlaýşyny eşitmek isleýärin” – diýip, komik aýtdy. Geçenki dabarada “Brutalist” filmi üçin “Iň gowy aktýor” nominasiýasynda ýeňiş gazanan Brodiniň çykyşy dabaranyň taryhynda iň uzak dowam eden çykyş bolupdy.
“Konan ajaýyp alypbaryjy boldy – ol agşamy degişme, mähir we hormat bilen alyp bardy. Biz onuň bilen ýene işleşmäge şat” – diýip, guramaçylar aýtdy.
97-nji “Oskar” dabarasy 19,69 mln tomaşaçyny ekrana çekdi – bu soňky bäş ýylda rekord. Sosial ulgamlarda dabara 104,2 mln gezek ýatlanyp, “Gremmiden” we Superkubokdan öňe geçdi.
Geçen “Oskaryň” esasy baýrak eýesi bolsa Şon Beýkeriň “Anora” dramasy boldy. Film bäş heýkel aldy.
