Kosta-Rika «InterNations-yň» reýtinginde 2024-nji ýylda göçmek üçin iň dostlukly we amatly ýurt hökmünde birinji orny eýeledi.
53 ýurtdan azyndan 50 ekspaty (Ekspat - bir döwletiň raýaty bolup, zähmet şertnamasy esasynda başga bir döwletde zähmet çekýän şahs) öz içine alýan soragnamada gatnaşyjylaryň 83%-i özlerini bu ýurtda öz öýünde ýaly duýýandyklaryny, 88%-i bolsa özleriniň myhman hökmünde örän gowy kabul edilýändiklerini aýtdylar. Şeýle-de gatnaşyjylaryň 35%-i ýerli medeniýete uýgunlaşmagyň aňsatdygyny aýdýar (ortaça görkeziji 21%). Ekspatlar şeýle hem Kosta-Rikanyň ýerli ilatyny dünýäniň iň dost-doganlykly adamlary hökmünde häsiýetlendirdiler.
Ikinji orunda «dost tapmak» kategoriýasynda öňdeligi eýelän Meksika durýar: bu ýurtda ýaşaýan ekspatlar jemgyýetçilik durmuşyndan hoşal bolup, ýerli ilat bilen aňsatlyk bilen "dil tapyşyp" bilýän eken. Üçünji orny bolsa Filippinler eýeledi, bu ýurt hiç bir kategoriýada altynjy orundan aşak düşmedi.
Sanawyň iň soňky orunlarynda Kuweýt, Norwegiýa we Germaniýa bar. Ekspatlar bu ýurtlary göçmek üçin iň kyn ýerler hasaplaýarlar.
