Tesla, Lucid we Polestar-yň öňki ýolbaşçylary tarapyndan esaslandyrylan Longbow startapy iki ýeňil elektromobili - Speedster we Roadster-i hödürledi. Awtoulaglar iň ýeňil agramy we ýokary dinamikany özünde jemleýän meşhur Lotus Elise we Jaguar E-Type-yň “ruhy mirasdüşerleri” hökmünde çykyş edýärler.
Ilkibaşda 895 kg agramly Speedster açyk sport awtoulagy satuwa çykar. Onuň 443 km ýol ätiýaçlygy bolup, 3,5 sekuntda 100 km/sag tizlige ýetýär. Awtoulagyň ilkinji tapgyryny (150 awtoulag) 2026-njy ýylda ibermek meýilleşdirilýär. Başlangyç bahasy 84,995 funt sterling.
Soňra 995 kg agramly we 3,6 sekuntda 100 km/sag tizlige ýetýän has amatly (£ 64,995) Roadster çykarylar.
Häzirki zaman elektromobilleriň agramy 2000 kg-dan gowrakdyr. Hatda 2012-nji ýylda çykarylan Tesla Roadster-iň agramy hem (1305 kg) Longbow-yň agramyndan ýokarydyr.
Kompaniýanyň baş direktory Deýwid Deýwi: "Biziň awtoulaglarymyz çeýeligi, deňagramlylygy we elektrik güýji özünde jemleýärler".
Longbow esasy ünsi ýeňillige we elýeterlilige berýär. Awtoulaglar çalşylýan komponentleri bolan alýumin şassisinde gurlandyr. Bu komponentler üçünji tarap öndürijilerden satyn alnyp, çykdajylary azaltsa-da, awtoulagyň kuwwatyny peseldýär.
Täze önüm öňünden sargyt etmek üçin elýeterlidir we onuň ilkinji nusgasy ýylyň ahyryna çenli görkeziler.
