Baidu iki sany täze emeli aň (EA) modeliniň işe girizilendigini habar berdi. Kompaniýanyň bellemegine görä, olardan biri DeepSeek R1 bilen deňeçer mümkinçiliklere eýe, emma bahasy iki esse arzan. Bu barada «Reuters» neşiri habar berýär.
Birinji model – ERNIE X1, güýçli logiki seljeriş, meýilleşdiriş we öz-özüni derňemek (refleksiýa) ukyby bolan EA hökmünde görkezilýär. Baidu X1-i «çuň pikirlenýän EA» diýip atlandyrýar we onuň dürli gurallary garaşsyz ulanyp bilýändigini aýdýar.
Ikinji model – ERNIE 4.5 – Baidu-nyň dil modeliniň kämilleşdirilen wersiýasydyr. Ol teksti has takyk düşündirip bilmek, ösen tekst generasiýasy, logiki pikirleniş we maglumaty ýatda saklamak ukyplary bilen tapawutlanýar. Şeýle-de bu model memlere we satirik suratlara hem düşünip bilýär.
Baidu Hytaýda ChatGPT-ä bäsdeş bolan ilkinji kompaniýalaryň biri bolsa-da, onuň öňki ERNIE wersiýalary giňden ulanylmady.
Emma indi Hytaýda EA bäsleşiginiň has-da güýçlenmegi we DeepSeek-iň gazanan üstünlikleri sebäpli, Baidu global EA ýaryşynda ornuny pugtalandyrmaga çalyşýar.
