Tbiliside Zaha Hadid Architects (ZHA) binagärlik edarasynyň taslamasy boýunça Cityzen Tower gökdirän binasynyň gurluşygyna başlamak meýilleşdirilýär. Onuň dizaýny şäheriň baýyrly landşaftyndan ylham alýar.
42 gatly bina Saburtalo etrabynda Zakawkaziýa harby okrugynyň öňki baş edarasynyň ýerinde gurlar. Onuň açylyş dabarasy 2028-nji ýylda meýilleşdirilýär.
Binanyň esasy aýratynlygy – spiral görnüşinde aýlanyp gidýän giň basgançakly terrasalardyr. Terrasalar bina bir gapdalyndan “söýget berip duran” ýaly. ZHA-da aýtmaklaryna görä, olaryň ýerleşişi Günüň ýagdaýyny we ýeliň ugruny göz öňünde tutýar. Binagärler Tbilisiniň baýyrlyk relýefinden ylham aldylar.
Toplumyň umumy meýdany 57 müň m² bolar. Aşaky gatlarda ýaşyl terrasalara çykylýan ofisler, dükanlar we kafeler ýerleşer. Ýokarky gatlarda şähere we golaýdaky seýilgähe tarap açylýan görnüşler ýaýylýan balkonly ýaşaýyş jaýlary bolar.
Binanyň gurluşygynda gaýtadan işlenen materiallary we ýerli gurluşyk materiallaryny ulanmak meýilleşdirýärler. Gökdirän binalarda ýagyş suwlaryny ýygnamak üçin suw howdany bolar, terrasalara bolsa güýçli suwarmagy talap etmeýän ýerli ösümlikler ekilip, gök öwser.
