Türkmenistanyň Stambul şäherindäki Baş Konsullygy Halkara parahatçylyk we ynanyşmak ýylyna we Türkmenistanyň hemişelik Bitaraplygynyň 30 ýyllygyna bagyşlap brifing geçirdi.
Brifinge Türkiýede Bahçaşehir Uniwersitetiniň, Stambul şäherindäki ýokary okuw jaýlarynyň «Türk dünýäsi» klubunyň ýolbaşçylary we Türkmenistanyň, Azerbaýjanyň, Özbegistanyň we Gazagystanyň talyplary hem-de ýerli habar beriş serişdeleriniň wekilleri gatnaşdylar.
Türkmenistanyň Stambul şäherindäki Baş Konsuly M.Öwezow öz çykyşynda ýylyň dowamynda Türkmenistanyň hemişelik Bitaraplygynyň 30 ýyllygyna bagyşlanyp halkara derejesinde geçiriljek çäreler barada durup geçdi.
Şeýle-de diplomat Türkmenistanyň dünýä derejesinde öňe sürýän başlangyçlary hem-de ýylyň dowamyndaky işleriniň we ileri tutýan ugurlarynyň Konsepsiýasy bilen tanyşdyrdy.
Brifingiň dowamynda 2025-nji ýylda Türkmenistanyň hemişelik Bitaraplygynyň 30 ýyllygy, BMG-nyň döredilmeginiň 80 ýyllygy hem-de Türkmenistanyň halkara we döwlet derejesinde geçiriljek möhüm çäreleriň aýratyn ähmiýete we many-mazmuna eýe bolýandygy nygtaldy.
Şeýle hem, çäräniň çäklerinde Türkmenistanyň Halk Maslahatynyň Başlygy Gurbanguly Berdimuhamedowyň «Hakyda göwheri» atly kitabynyň tanyşdyrylyş dabarasy geçirildi.
