ABŞ-nyň Los-Anjeles şäherinde ýerleşýän Gantri dizaýn studiýasy Pariž moda hepdeliginde şöhle saçýan Bag Table Light atly sumkasyny tanyşdyrdy.
Sumkanyň döredijileri ony «kutýur bilen bezegiň arasyndaky araçäkleri aýyrýan bir zat» diýip atlandyrýarlar. Aksessuaryň daşky örtügi ösümlik esasly, ýarym görünmeýän polimerden 3D printer arkaly taýýarlanypdyr.
Bag Table Light sumkasynyň ölçegleri: 30,48 × 26,67 × 14,6 sm. Onuň içinde ýagtylygynyň derejesini sazlap bolýan iki sany E12 LED lampa ýerleşdirilipdir. Olaryň ýagtylyk temperaturasy 2700K, ýagtylyk güýji 600 lýumen, kuwwaty bolsa 6,4 watt. Sumkanyň içinde akkumulýator ýok, ýagtylyk sumkanyň içine berkidilen elektrik kabeli arkaly üpjün edilýär.
«Döredijiligiň çyragy, futuristik moda bilen durnukly innowasiýalaryň utgaşmasy, size her gün çäkleriňizi giňeltmegiň we gündelik durmuşyňyzda adaty düşünjelere garşy durmagyň möhümdigini ýatladyp durýar» — diýip, Gantri topary belleýär.
Bu sumka kaliforniýaly Tombogo moda brendiniň dizaýnerleri bilen bilelikde işlenip düzüldi.
Emma bu sumkanyň birje esasy kemçiligi bar – hiç hili jübüsi ýa-da zat salynýan ýeri ýok. Modamy? Hawa. Stiliň özenimi? Hawa. Ýaşlara laýykmy? Elbetde. Amaly taýdan peýdalymy? Hiç ýok.
Bag Table Light sumkasynyň bahasy 398 dollar bolup, ABŞ-da satuwlaryna eýýämden başlandy.
