Pariž medeniýet we sungat muşdaklary üçin iň gowy şäher hökmünde saýlandy

Pariž 2025-nji ýylda medeniýet we sungat söýüjileri üçin dünýäniň iň gowy şäheri diýlip ykrar edildi. Bu barada Time Out žurnaly habar berdi, ol dünýäniň dürli şäherlerinden 18,5 müňden gowrak ýaşaýjy bilen pikir soraşma geçirdi.

Gatnaşyjylardan hil we elýeterlilik taýdan öz şäherleriniň medeni tekliplerine baha bermek soraldy. Sanawa öz ýurtlarynda iň ýokary bahalary alan şäherler girdi. Soňra Time Out-yň halkara redaktorlar we awtorlar ulgamyndan medeniýet boýunça hünärmenleri öz halaýan ugurlary üçin ses berdi.
Ahyrky sanawa dünýäniň iň öňdebaryjy 20 medeni merkezi girdi. Bellenilişi ýaly, bu şäherlerde medeniýet diňe bir muzeýler we teatrlar bilen çäklenmeýär, eýsem ol ýerde köçe festiwallary, gijeki gezelençler, jemgyýetçilik galereýalary we döredijiligiň täze görnüşleri medeni durmuşyň möhüm bölegi hasaplanýar.
Pariž reýtingde birinji orny eýeledi. Ýerli ýaşaýjylaryň 96%-i şäheriň medeni durmuşyny “gowy” ýa-da “ajaýyp” diýip atlandyrdy. Şeýle-de, fransuz paýtagty Time Out-yň hünärmenlerinden has köp ses aldy.
Şäherde Luwr, Orse, Tokio köşgi we Fransua Pino muzeýi ýaly dünýä belli muzeýler bar. Şeýle-de, ýaşaýjylar Fête de la Musique baýramçylygy we La-Willet seýilgähinde geçirilýän Cinema en Plein Air tomusky festiwaly ýaly möwsümleýin medeni wakalara ýokary baha berdi.
2025-nji ýylyň reýtinginde iň gowy 20 şäher şu aşakdakylardan ybarat:

1. Pariž, Fransiýa.
2. Florensiýa, Italiýa.
3. Edinburg, Şotlandiýa.
4. Mehiko, Meksika.
5. Sidneý, Awstraliýa.
6. Barselona, Ispaniýa.
7. Çikago, ABŞ.
8. Lissabon, Portugaliýa.
9. Hanoý, Wýetnam.
10. Keýptaun, GAR.
11. Pekin, Hytaý.
12. Tbilisi, Gruziýa.
13. Jakarta, Indoneziýa.
14. Deli, Hindistan.
15. Medelin, Kolumbiýa.
16. Amsterdam, Niderlandlar.
17. Marakeş, Marokko.
18. Wena, Awstriýa.
19. Praga, Çehiýa.
20. Abu-Dabi, BAE.