Abu-Dabi dünýäde iň uly dron şüweleňini geçirmäge taýýarlanýar. Asmana bir wagtda 10 000 dron galyp, sinhronly yşyk kompozisiýasyny döreder.
Şüweleň Abu-Dabiniň Medeniýet we syýahatçylyk departamenti bilen Nova Sky Stories (ABŞ) kompaniýasynyň arasynda baglaşylan şertnamanyň çäklerinde geçer. Gol çekmek dabarasyna BAE-niň syýasy lideri we dolandyryjy maşgalanyň agzasy şeýh Halid ibn Muhammad Al Nahaýýan gatnaşdy.
Çäre tehnologiýany, medeniýeti we sungaty birleşdirýän taslamanyň bir bölegi bolar. Dronlar emirligiň iň belli ýerlerinde uçup, şäher peýzažyny dinamiki yşyk şüweleňine öwrer.
Taslama Medeniýet we syýahatçylyk departamenti, Nova Sky Stories we garyşyk hakykat tehnologiýalaryna ýöriteleşen Analog kompaniýasy tarapyndan durmuşa geçiriler. Dronlar dürli şekilleri, nagyşlary we golografiki sahnalary döreder.
Guramaçylaryň aýtmagyna görä, şüweleň şäher dynç alşyna täze görnüş berer. Harby pudakda ulanylýan dronlar sungat guralyna öwrüler. Ilkinji görkezişler Abu-Dabiniň esasy ýerlerinde bolar.
Şüweleň yzygiderli bolup biler we şäheriň innowasion dynç alyş merkezi hökmünde statusyny berkider.
