“Maklarenden” britaniýaly Lando Norris Awstraliýanyň Gran-prisinde ýeňiş gazandy. Melburnda ýagyşly howada geçirilen ýaryş “Formula-1-iň” täze möwsümine badalga berdi.
Norris ýaryşa öňdäki orundan başlady. Ol “Red Bull-dan” häzirki çempion, niderlandly Maks Werstappenden öňe geçdi. Üçünji bolup pellehana Jorj Rassel (“Mersedes”) geldi.
Norrisiň “Maklarendäki” topardaşy, awstraliýaly Oskar Piastri ýaryşy dokuzynjy orunda tamamlady. Indi “Ferraride” çykyş edýän ýedi gezek dünýä çempiony Lýuis Hemilton bolsa 10-njy netijäni görkezdi.
Birnäçe sürüji pellehana ýetip bilmedi: Jek Duen (“Alpin”), Karlos Saýns (“Uilýams”), Fernando Alonso (“Aston Martin”), Liam Louson (“Red Bull”) we Gabriel Bortoleto (“Kik Sauber”). “Reýsing Bullzdan” Isaak Hajar heniz ýaryş başlamanka, “gyzdyryjy” aýlawda haýaty urup, bolidine zeper ýetirdi.
Indiki tapgyr bolan Hytaýyň Gran-prisi 21 – 23-nji martda geçiriler. Onuň çäklerinde sprint ýaryşy bolar.
