Jaguar Pariždäki moda hepdeliginiň dowamynda Type 00 konsept-karyny görkezdi. Tanyşdyrylyşdan wideo kompaniýanyň Instagram akkauntynda peýda boldy. Model futuristik dizaýny, awtonom hereketi we tanyşdyryşa aktýor Barri Keoganyň gatnaşmagy bilen ünsi özüne çekdi.
“French Ultramarine” reňkli awtomobil agressiw optikasy, pes oturyş ýagdaýy we “kebelek” görnüşli uly gapylary bilen tapawutlanýar. Täze gök reňk öňki gülgüne reňkiň ornuny çalşyp, modeliň sport stilini görkezýär.
Type 00 2025-nji ýylyň ahyrynda çykjak dört gapyly elektrik superkar üçin esas bolar. Jaguar-yň ýolbaşçysy Rawdon Gloweriň aýtmagyna görä, önümçilik wersiýasy konseptiň üýtgeşik dizaýnyny saklar: uzyn kapot, inçe faralar, ýapgyt üçek we giň tigir bazasy.
Ulag 692 km çenli menzil we 986 at güýji bilen JEA platformasynda gurlar.
Modeliň interýeri kaşaňlyga we rahatlyga ünsi jemleýär. Jaguar “sürüji” çemeleşmesini wada berýär: salonda premium materiallar ulanylar, kömek ulgamlary we multimedia bolsa dolandyryş tejribesiniň üstüni ýetirer.
Internet ulanyjylar bu ulaga dürlüçe seslendi. Käbirleri onuň wideo oýunda ýa-da kompýuter grafikasynyň kömegi bilen döredilendigini belledi. Beýlekiler bolsa ony Betmobil bilen deňeşdirdi. Mundan başga-da, gapylaryň haýal açylmagy özara gürrüňlere getirdi – wideoda Barri Keoganyň gapy doly açylyp ýetişmänkä aýagyny salondan çykarandygy görünýär.
