Honda-nyň Hytaýda kompaniýanyň ýangyç bilen işleýän awtomobilleri üçin hereketlendirijileriň, takmynan, 30%-ini öndürýän Guançžoudaky zawody öz önümçilik kuwwatyny iki esse azaldar. Bu barada awtoöndürijiniň özi habar berýär.
Şeýle çözgüt Hytaýda elektromobil bazarynyň işjeň ösmegi bilen baglanyşyklydyr. Bu ýerli brendleriň arasyndaky bäsdeşligi güýçlendirýär, Honda bolsa täze tehnologiýalara geçmekden yza galýar.
Şol sebäpli kompaniýa üýtgeşmelere uýgunlaşmak üçin, öz gurluşyny özgertmegini çaltlaşdyrýar.
Toyota we Nissan ýaly ýapon kompaniýalary hem hytaý bazarynda kynçylyk çekýär, ýöne Honda-nyň önümçiliginiň azaldylmagy olaryň arasynda iň ulusy boldy. Içinden ýandyrylýan hereketlendirijiler sebitde bu brend üçin geçmişde galyp biler.
2024-nji ýylyň dekabrynda GAC Honda ýylda 120 000 awtomobil kuwwaty bilen täze energetika zawodyny işe girizdi. Önümçilik “uglerod zyňyndylarynyň nol derejesiniň” wada berilmegi bilen başlady. Bu ädim Honda-nyň bäsdeşleriň yzyndan ýetmek üçin ekologiýa taýdan arassa tehnologiýalara bil baglaýandygyny görkezýär. Ýöne kompaniýanyň dünýäniň iň uly awtomobil bazarlarynyň birinde öz strategiýasyny näderejede tiz üýtgedip biljekdigi belli däl.
