BMW awtoulaglaryny täze tehnologiýasy bilen çykarmaga taýynlanýar. Dört güýçli kompýuteriň düzümindäki ulgam «Superbrains» (super beýniler) diýlip atlandyrylýar. Bu barada «autoevolution» neşiri habar berýär.
Bu enjamlar awtoulaglaryň esasy funksiýalaryny – ýagny sürüş dinamikasyny, awtomatiki dolandyryşy, multimediýany we rahatlyk ulgamlaryny dolandyrar. 2025-nji ýylda çykjak modeller üçin ýörite işlenip düzülen bu ulgam häzirki tehnologiýalar bilen deňeşdirilende 20 esse güýçli hasaplaýyş kuwwatyny üpjün eder. Awtoulaglaryň esasy ulgamlary täze zolaklaýyn simli arhitektura bilen dolandyrylar, bu bolsa simleriň umumy uzynlygyny 600 metr gysgaldyp, awtoulagyň agramyny 30% azaldar.
BMW täze sanly howpsuzlyk ulgamyna – Smart eFuses-a aýratyn üns berýär. Bu ulgam 150 sany adaty predohraniteliň ornuny tutýar we energiýanyň netijeliligini 20% ýokarlandyrýar. Şeýle-de täze «Heart of Joy» (Şatlygyň ýüregi) dolandyryş ulgamy motoryň we şassiniň has çalt we takyk dolandyrylmagyny üpjün edip, häzirki ulgamlara garanyňda 10 esse tiz jogap bermegine ýardam berýär.
BMW-niň metbugat merkeziniň habaryna görä, bu innowasion ulgam «Vision Driving Experience» konsept awtoulagynda synagdan geçirildi. Täze çemeleşmäniň ilkinji giňden ulanylýan modeli öňümizdäki güýzde çykarylmagy meýilleşdirilýän elektrikli krossower «BMW iX3» bolar. Bu tehnologiýalar BMW-niň programma üpjünçiligi bilen dolandyrylýan awtoulaglara geçişini alamatlandyrýar hem-de yzygiderli täzelenmek we kämilleşmek ýaly mümkinçilikleriň öňüni açýar.
