Täze okuw ýylyndan başlap Pekiniň (Hytaý) başlangyç we orta mekdeplerinde okuwçylara emeli aň (EA) boýunça sapaklar berlip başlanar. Bu karar Hytaýyň ösen tehnologiýalar ulgamyndaky öňdeligini gorap saklamak maksady bilen kabul edildi diýip, «Bloomberg» neşiri habar berýär.
Pekin şäher bilim komissiýasynyň berýän maglumatlaryna görä, 1-nji sentýabrdan başlap, okuwçylara ýylyň dowamynda azyndan sekiz sagat emeli aň sapaklary okadylar. Bu sapaklar aýratyn ders hökmünde okadylybam bilner ýa-da informatika we tebigy ylymlar ýaly bar bolan dersleriň düzümine-de girizilip bilner.
Hytaý köp wagtdan bäri emeli aň tehnologiýasynda öňdebaryjy orny eýelemegi maksat edinip gelýär. Bu ugra bolan gyzyklanma, esasan-da Hytaýyň DeepSeek atly startapynyň üstünliklerinden soň has-da artdy. DeepSeek kompaniýasy ABŞ-nyň öňdebaryjy kompaniýalarynyň önümleri bilen deňeşdirip bolýan, emma has az serişde talap edýän emeli aň modelini işläp düzdi.
Hytaýyň bilim ministri Huaý Szinpen emeli aňyň ösüşiniň bilim ulgamynda täze mümkinçilikleriň öňüni açýandygyny belledi. Onuň sözlerine görä, 2025-nji ýylda Hytaýyň ýolbaşçylary emeli aň boýunça resmi «Ak kitaby» neşir etmegi meýilleşdirýärler. Bu resminama – tehnologiýalaryň bilim ulgamyna giňişleýin ornaşdyrylmagy boýunça möhüm ýol görkeziji bolar.
