Türkmenistanyň Oguz han adyndaky Inžener-tehnologiýalar uniwersitetiniň ýurdumyz boýunça orta mekdep okuwçylarynyň arasynda geçirilýän "Oguz hanyň zehinli nesilleri" atly III integrirlenen olimpiadasynyň I etrap tapgyryna badalga berildi. Bu barada uniwersitetiň resmi saýtynda habar berilýär.
Guramaçylyk toparynyň hasabatyna görä, Türkmenistanyň ähli künjeklerinden bu olimpiadanyň I tapgyryna gatnaşmaga isleg bildirip, hasaba alnan mekdep okuwçylarynyň sany 25 müňe golaýlady.
Bellenilişi ýaly, olimpiada gatnaşýanlaryň arasynda iňlis dili, tebigy we takyk ugurly dersler boýunça döwlet we halkara ders bäsleşiklerinde, şeýle-de taslama bäsleşiklerinde ýeňiji bolan okuwçylaryň sany agdyklyk edýär.
Häzirki wagtda olimpiadany guramaçylykly geçirmek we adalatly baha bermek maksady bilen döredilen topar tarapyndan taýýarlyk işleri alnyp barylýar. Olimpiada baradaky maglumatlar we ony geçirmegiň düzgünnamasy uniwersitetiň resmi internet sahypasy — https://etut.edu.tm salgysynda ýerleşdirildi.
Türkmenistanyň taryhynda köpçülikleýin geçirilýän bu görnüşdäki olimpiada eýýäm üçünji gezek guralýar. I we II olimpiadalara jemi 42 müňe golaý okuwçy gatnaşdy. Ýeňiji bolanlara uniwersitetiň diplomy we sowgatlary gowşurylýar. Uniwersitet tarapyndan ýeňiji bolanlara ýurdumyzyň we daşary ýurtlaryň ýokary okuw mekdeplerine girmeklerine ýardam bermek maksady bilen, «Teklip haty» (Recommendation letter) berler.
