12-nji martda Stambul şäherinde Türki Döwletleriň Guramasynyň (TDG) sekretariatynyň binasynda TDG-niň guramasynyň Utgaşdyryjy komitetiniň 5-nji mejlisi geçirildi.
Duşuşyga Azerbaýjanyň, Gazagystanyň, Gyrgyz Respublikasynyň, Türkiýäniň, Özbegistanyň daşary işler ministrleriniň orunbasarlary, Wengriýanyň Türkiýedäki ilçisi, TDG-niň, TÜRKSOÝ-niň we TÜRKPA-niň Baş sekretarlary hem-de Türki Akademiýasynyň, Türki halklaryň medeniýet we miras gaznasynyň we Türk maýa goýum gaznasynyň ýolbaşçylary gatnaşdy. Türkmenistana ýurdumyzyň Türkiýedäki ilçisi M.Işangulyýew wekilçilik etdi.
Mejlisiň çäklerinde TDG-niň 11-nji Sammitiniň çäklerinde kabul edilen çözgütleriň ýerine ýetirilşi, TDG-niň çäklerindäki bilelikdäki hyzmatdaşlyk hem-de 2025-nji ýylyň dowamynda ýerine ýetiriljek işleriň Meýilnamasy ara alnyp maslahatlaşyldy. Bulardan başgada, mejlisiň çäklerinde Türki hyzmatdaşlyk Guramalarynyň ýolbaşçylary 2024-nji ýylyň dowamynda ýerine ýetirilen işler boýunça öz hasabatlary bilen çykyş etdiler.
Türkmen wekiliýeti mejlise gatnaşyjylaryň ünsüni Türkmenistanyň başlangyjy bilen BMG-niň Baş Assambleýasynyň 2025-nji ýyly Halkara parahatçylyk we ynanyşmak ýyly diýip yglan etmek baradaky Kararnamasyny kabul etmeginiň ähmiýetine çekdi.
