Müsüriň futbol assosiasiýasynyň prezidenti Hani Abo Rida FIFA-dan 2034-nji ýyldaky Dünýä çempionatynyň toparlaýyn tapgyrynyň käbir oýunlaryny kabul etmek üçin hukugyň berilmegini haýyş etdi diýip, «Newscentral» habar berýär.
2024-nji ýylyň 11-nji dekabrynda geçirilen FIFA kongresinde, Saud Arabystany 2034-nji ýyldaky dünýä çempionatynyň resmi guramaçysy hökmünde tassyklandy. Afrikanyň futbol konfederasiýasynyň baş assambleýasynda, Müsüriň futbol assosiasiýasynyň prezidenti Hani Abo Rida Saud Arabystanynyň bu uly ýaryş boýunça görýän taýýarlygyna ýokary baha berdi we olaryň dalaşgärligini goldady. Şeýle-de ol, FIFA-nyň Müsüre Afrikanyň käbir oýunlaryny kabul etmäge mümkinçilik berjekdigine umyt bildirýändigini aýtdy.
Müsür ilkinji gezek 1934-nji ýyldaky dünýä çempionatyna gatnaşyp, bu ýaryşda çykyş eden ilkinji afrikan ýygyndysy bolupdy.
2030-njy ýylda FIFA ilkinji dünýä çempionatynyň ýüz ýyllygyny belleýär. 1930-njy ýylda geçirilen bu ýaryş Urugwaýyň paýtagty Montewideo şäherinde gurnalypdy. Bu şanly senäniň hormatyna, toparlaýyn tapgyryň käbir oýunlary Urugwaýda, Paragwaýda we Argentinada geçiriler. Esasy guramaçy ýurtlar bolsa Ispaniýa, Portugaliýa we Marokko bolar.
