11-nji dekabrda geçirilen Halkara futbol federasiýasynyň (FIFA) kongresinde 2030-njy we 2034-nji ýyllarda futbol boýunça dünýä çempionatlaryny kabul etjek ýurtlar resmi taýdan tassyklandy. Çözgüt adaty bolmadyk görnüşde ses bermek – el çarpyşmalar arkaly kabul edildi diýip, The Guardian habar berýär.
Ozal hem belli bolşy ýaly, 2030-njy ýylda dünýä çempionaty bir wagtyň özünde birnäçe ýurtda – Marokkoda, Portugaliýada we Ispaniýada geçiriler. Ýaryşyň 100 ýyllygy mynasybetli ýene üç oýun Günorta Amerikada – Urugwaýda, Paragwaýda we Argentinada geçiriler.
2034-nji ýylyň dünýä çempionatyny Saud Arabystany kabul eder. Ýurt ýeke-täk dalaşgär boldy, bu hem onuň arzasyny biragyzdan tassyklamaga mümkinçilik berdi. Patyşalyk 11 sany täze stadion gurmagy meýilleşdirýär we eýýäm birnäçe iri taslamalary işe girizdi.
48 toparyň gatnaşmagynda ýaryş bäş şäherde, şol sanda Er-Riýadda geçiriler. Yssy howa sebäpli ýaryşlar 2022-nji ýylda Katarda bolşy ýaly gyşky döwre geçirilip bilner.
Ýatlap geçsek, 2026-njy ýylda dünýä çempionaty ABŞ-da, Kanadada we Meksikada geçiriler. Ýaryşyň häzirki çempiony Katardaky ýaryşda ýeňiji bolan Argentinanyň milli ýygyndysydyr.
