Xiaomi 16 Pro smartfonynyň 3D çap etmek arkaly ýasalan, demirden orta çarçuwa bilen enjamlaşdyrmagy meýilleşdirýändigi barada maglumat peýda bolupdy. Indi meşhur Digital Chat Station insaýderi bu hakykaty tassyklady we käbir täze jikme-jiklikleri aýan etdi diýip, Notebookcheck.net habar berýär.
Maglumatlara görä, çarçuwa alýuminden ýa-da titandan bolup biler, bu sowadyş ulgamyna täsir eder hem-de enjamy has ýeňleder we güýçlendirer. Üstesine, şeýle çarçuwalaryň köpçülikleýin öndürilmegi garaşylyşyndan has arzan bolup biler.
Mundan başga-da, Xiaomi 16 Pro dürli funksiýalary - emeli aňy işjeňleşdirmekden başlap, sessiz režime geçmeklige çenli ýerine ýetirip bilýän ýöriteleşdirilen düwmäni alar. Bu iPhone 16 Pro-daky Action Button-a meňzeýär. Emma bu düwmäniň goşulmagy batareýanyň kuwwatyny 100mAh azaldyp biler, şeýle-de bolsa 7000 mAh-da bu uly bir täsirini ýetirmez.
Xiaomi 16 seriýasynda häzirki modellerden tapawutly tegelek burçly tekiz displeýler bolar. Şeýle hem, ekranlarda çipleriň ýerleşdirilmegini optimizirlemek arkaly çarçuwalary kiçeltmäge mümkinçilik berýän LIPO tehnologiýasy ulanylar.
