Beýik Britaniýanyň akademiki jemgyýetçiliginiň wekilleri Türkmenistan bilen bilim babatda hyzmatdaşlygyny giňeltmek boýunça başlangyçlaryny öňe sürdüler. Türkmen-Britan söwda-senagat geňeşiniň (TUKTIC) mejlisiniň çäklerinde geçirilen duşuşykda Britaniýanyň bilim maksatnamalaryny utgaşdyrmak, okatmagyň häzirki zaman okuw usulyýetlerini ulanmak we iňlis dilini öwrenmek mümkinçiliginiň gerimini giňeltmek bilen baglanyşykly meseleler ara alnyp maslahatlaşyldy. Bu barada Türkmenistanyň Bilim ministrliginiň saýtynda habar berilýär.
Britan tarapy Türkmenistanda London uniwersitetiniň bilim maksatnamalaryny durmuşa geçirmek mümkinçiligi ara alnyp maslahatlaşyldy. Maksatnamalaryň amala aşyrylmagy talyplara ýurduň çäginden çykman halkara derejesinde ykrar edilýän diplomlary almaga mümkinçilik döreder.
London uniwersitetiniň wekilleri hyzmatdaşlygyň esasy ugurlarynyň biri hökmünde zerur hünärler boýunça maksatnamalaryň ähmiýetini nygtap geçdiler. Londonyň öňdebaryjy kollejleriniň ýolbaşçylygynda şu aşakdaky ugurlar boýunça okuw meýilnamalary işlenip düzüldi:
- Kompýuter ylymlary (Goldsmiths, University of London) – sanly ykdysadyýet üçin hünärmenleri taýýarlamak.
- Işewürligi dolandyrmak (Royal Holloway, University of London) – hususy we döwlet pudaklary üçin dolandyryjylary taýýarlamak.
- Hukuk öwreniş (Queen Mary, University of London) –hukuk boýunça halkara derejeli hünärmenleri taýýarlamak.
- Marketing (Royal Holloway, University of London) – marketing boýunça hünärmenleri taýýarlamak.
- Maliýe we buhgalteriýa hasabaty (London School of Economics and Political Science, LSE) – maliýe pudagy üçin hünärmenleri taýýarlamak.
Professor Dewid Beýker (London uniwersiteti) wajyp meseleleriň hatarynda British Education Network (BEN) arkaly ýol açylýan mümkinçilikler barada aýdyp geçdi. BEN Britaniýanyň öňdebaryjy uniwersitetleri birleşdirýän platforma bolup, häzirki zaman bilim tehnologiýalaryna giň elýeterliligiň bolmagyny üpjün edýär. BEN arkaly talyplar London uniwersitetiniň bilim maksatnamalary boýunça bilim alyp bilerler, bu bolsa olaryň akademiki we hünär ösüşindäki mümkinçiliklerini giňelder.
Britan tarapy hyzmatdaşlygyň düzümine şu aşakdakyklaryň girizilmeginiň hem mümkindigini belläp geçdi:
- Iňlis diliniň okadylyşyny goldamak, Türkmenistanda sertifikatlaşdyrylan IELTS we TOEFL synaglaryny guramak.
- Akademiki alşygynyň ösdürilmegi, bu bolsa mugallymlara we talyplara tejribe alyşmak üçin täze mümkinçiligi üpjün eder.
- Okuwyň çeýe görnüşleriniň, şol sanda onlaýn okuwlar we garyşyk okuw maksatnamalarynyň (blended learning) ulanylmagy.
Ýakyn geljekde bu ugurdaky başlangyçlary durmuşa geçirilmegiň anyk mehanizmlerini işläp düzmäge gönükdirilen gepleşikleriň dowam etdirilmegi meýilleşdirilýär.
