Germaniýanyň Deutsche Bahn demirýol konserni 2024-nji ýylda otlularyň gijä galandygy we ýatyrylandygy üçin ulanyjylara 196,8 mln ýewro möçberde öwez tölegini töledi. Bu “täze gynançly rekord” diýip, Bild am Sonntag neşiri kompaniýanyň maglumatlaryna salgylanyp ýazýar.
Bu mukdar 2023-nji ýylyň görkezijisinden 64 mln ýewro köp boldy, şol ýyl kompaniýa 132 mln ýewro töläpdi.
Deutsche Bahn gijikdirmeleriň 80%-iniň demirýol ulgamynyň könelmegi we hereketiň köp bolmagy bilen baglanyşyklydygyny düşündirdi.
Kompaniýa şu onýyllygyň ahyryna çenli ýollary, aragatnaşyk ulgamlaryny we stansiýalary düýpli abatlamak üçin tutuş Germaniýa boýunça 40 sany esasy demirýol bölegini birnäçe aý ýapmagy meýilleşdirýär.
Geçen ýyl ýolagçylar öwez tölegi üçin 6,9 mln arza tabşyrdy. Ony onlaýn resmileşdirmek bolýar. Geçen ýylky arzalaryň ýarysyna iki günüň içinde seredildi. Düzgünlere görä, otlynyň bir sagatdan gowrak gijä galandygy üçin petegiň bahasynyň 25%-i yzyna gaýtarylýar. 2 sagat we ondan gowrak gijä galan ýagdaýynda ýolagçylar petek bahasynyň 50%-ini yzyna alyp biler.
