Wenada döredilen gök-bakja önüm orkestri 344 konsertden soň Ginnesiň rekordlar kitabyna girdi. Sazandalar her çykyşdan öň gök hem-de bakja önümlerinden saz gurallaryny döredip, olaryň galyndylaryndan bolsa çorba taýýarlaýarlar.
Toparyň taryhy 1998-nji ýylda, haçan-da dostlar agşamlyk naharyny taýýarlamak üçin ýygnanyşanlarynda başlaýar. Döredijilik pikiriniň gözleginde bolmak bilen, olar aýdym-saz toparyny döretmek kararyna gelýär.
“Ähli zat degişmeden başlady” – diýip, esaslandyryjy Mattias Maýnhartert Ginnesiň rekordlar kitabyna aýtdy.
Sazandalar "saz gurallaryny" her gezek çykyşyň öňýanynda kesýärler, sebäbi alty sagatdan olar öz durkuny ýitirýär. Orkestriň üýtgeşik gurallarynyň arasynda käşir rekorderi, hyýar telefony, badamdan kakylyp çalynýan gural, poreý soganyndan skripka we ş.m. bar. Gök önümleriň galyndylary konsertden soň berilýän çorba üçin ulanylýar. Kesilen bölekler organiki galyndylar hökmünde gaýtadan ulanylýar.
“Biz beýleki bir gurallaryň berip bilmejek sesini döredip bilýäris diýip hasaplaýarys. Sen tapawudy eşidýärsiň. Käwagt bu haýwanlara, käwagt hyýaly (abstrakt) seslere meňzeş” – diýip, toparyň agzalary gürrüň berýär.
Sazandalar täze kompozisiýalaryň üstünde işlemegiň käwagt kyn bolýandygyny, ýöne toplanan tejribäniň kömek edýändigini belleýär. Konsert wagty artistler köpçülikden doly seslenmä garaşýar.
“Biz hakyky auditoriýanyň, üns jemlenen atmosferanyň we gowy akustikanyň bolan ýerinde çykyş etmegi gowy görýäris” – diýip, olar belledi.
