Benksiniň «Çig nebit (Wettriano)» atly suraty Londondaky Sotheby’s auksionynda, takmynan, 5,5 million dollara satyldy diýip, «BBC» habar berýär.
Surat «Blink-182» toparynyň bas-gitaristi Mark Hoppus tarapyndan satuwa çykaryldy. Ol suratyň satylmagyndan gelen girdejiniň bir bölegini Los-Anjelesdäki ýangynlardan ejir çekenlere kömek üçin bagyş etjekdigini aýtdy.
Benksi «Çig nebit» (Crude Oil) seriýasyny 2005-nji ýylda Londonda geçirilen ilkinji galereýa sergisi üçin döredipdi. Bu işlerinde ol meşhur suratlary satiriki usulda üýtgedipdi. Mysal üçin, Winsent Wan Goguň «Günebakarlar» (Sunflowers) ýa-da Edward Hopperiň «Ýarygijedäkiler» (Nighthawks) ýaly eserlerini täzeden işläpdi.
Auksionda satylan surat üçin bolsa, şotlandiýaly suratkeş Jek Wettrianonyň meşhur «Aýdym aýdýan baş hyzmatkär» (The Singing Butler) eserinden ylham alyndy. Benksi suraty göçürip, oňa batyp barýan nebit tankerini hem-de zäherli galyndylary göterýän iki adamyň şekilini goşdy.
Wettrianonyň asyl «Aýdym aýdýan baş hyzmatkäri» 2004-nji ýylda auksionda 744 müň funt sterlinge satylypdy. Şol wagt ol iň gymmat bahadan satylan şotlandiýaly surat bolupdy. Emma Benksiniň wersiýasy ondan has ýokary bahadan satyldy.
Mark Hoppusyň özi bu suraty 2011-nji ýylda satyn alypdy. Ol we aýaly Benksiniň eserlerini ilkinji gezek görenlerinde, olara «aşyk bolandyklaryny» aýtdylar.
