6-njy martda Pekin şäherinde “Halkara parahatçylyk we ynanyşmak ýyly: Türkmenistana maýa goýumlaryny çekmek boýunça maslahat” atly işewürlik forumy geçirildi. Bu barada Türkmenistanyň DIM-nde habar berdiler.
Forumy Türkmenistanyň Hytaý Halk Respublikasyndaky ilçihanasy we Hytaýyň kärhanalaryny daşary ýurtlarda ösdürmek boýunça assosiasiýasy bilelikdegurady. Forumyň maksady Assosiasiýanyň 40 sany hytaý agza-kompaniýalaryny Türkmenistanyň maýa goýum mümkinçilikleri bilen tanyşdyrmakdan ybarat boldy.
Duşuşygyň barşynda Türkmenistanyň ilçisi P.Durdyýew, Assosiasianyň prezidenti He Çženweý, şeýle hem ilçihananyň söwda wekili Ş.Batyrow çykyş etdiler.
Türkmenistanyň ilçisi öz çykyşynda hytaý telekeçilik ulgamynyň wekillerini Türkmenistan bilen işjeň hyzmatdaşlyga çagyrdy.
Ilçihananyň söwda wekili Ş.Batyrow öz çykyşynda hytaý maýa goýumlaryny çekmek üçin geljegi uly bolan pudaklary, ýagny nebit we gazhimiýa, agrosenagat toplumy, ulag we logistika, telekommunikasiýa we maglumat tehnologiýalary we beýleki ugurlary kesgitledi.
Duşuşygyň ahyrynda taraplar şu ýyl Aşgabat şäherinde ýöriteleşdirilen türkmen-hytaý işewürlik forumuny geçirmegiň mümkinçiliklerini ara alyp maslahatlaşdylar.
