Türkmenistanyň wekiliýeti 5-nji martda Tokio şäherinde geçirilen Suw meseleleri we tebigy betbagtçylyklar boýunça halkara simpoziuma gatnaşdy. Wekiliýetiň düzümine Türkmenistanyň Daşary işler ministrliginiň hem-de “Türkmensuwylymtaslama” Türkmen döwlet suw hojalyk ylmy-önümçilik we taslama instututynyň wekilleri girdi diýip, Türkmenistanyň DIM-niň metbugat gullugy habar berdi.
Çäräniň açylyş dabarasyna Ýaponiýanyň Imperatory Naruhito hem gatnaşdy.
Günüň ikinji ýarymynda “Merkezi Aziýa – Ýaponiýa” dialogynyň çäklerinde suw meseleleri boýunça bilermenleriň duşuşygy geçirildi.
Türkmenistanyň wekilleri öz çykyşlarynda Türkmenistanyň Prezidentiniň halkara forumlarynyň belent münberlerinde öňe süren suw serişdelerini goramak we oýlanşykly peýdalanmak boýunça başlangyçlary barada gürrüň berdiler. Hususan-da, Merkezi Aziýada durnukly ösüşi gazanmak nukdaýnazaryndan suw serişdeleriniň ähmiýeti nygtaldy.
Bellenilişi ýaly, serhetüsti suw hyzmatdaşlygy sebitde parahatçylygy, durnuklylygy we rowaçlygy üpjün etmekde möhüm ugurlaryň biri bolup durýar.
Suw meselesiniň howanyň ählumumy üýtgemegi bilen baglylykda has möhüm ähmiýete eýe bolup durýandygy, şol sebäpden hem suw serişdelerinden aýawly we oýlanyşykly peýdalanmagyň zerurdygy nygtaldy.
