Microsoft lukmanlar üçin EA kömekçisini – Dragon Copilot-y anons etdi. Kompaniýanyň aýtmagyna görä, ol lukmanlaryň administratiw ýüküni ýeňilleşdirip, olaryň kagyz işini azaldar we hassalara has köp üns bermäge mümkinçilik berer.
Dragon Copilot sözleýşi tanaýan we kabul ediş bölüminde lukmanyň hassa bilen gürrüňdeşligini resminamalaşdyrýan Dragon Medical One we DAX Copilot programmalarynyň esasynda döredildi. Täze kömekçi olaryň funksiýalaryny birleşdirýär: ol kliniki bellikleri, derman kabul etmek boýunça görkezmeleri, kabul edişden soň rezýumeni we beýleki resminamalary awtomatik taýdan taýýarlaýar.
“Bu tehnologiýanyň kömegi bilen lukmanlar kompýutere däl-de, hassa ünsi jemläp biler” – diýip, Microsoft-yň global saglygy goraýyş boýunça wise-prezidenti Dewid Rýu belledi.
Google Cloud-yň gözleglerine görä, lukmanlar administratiw işlerine hepdede 28 sagada çenli wagt sarp edýär, bu öz gezeginde professional argynlygyň sebäpleriniň birine öwrülýär.
Microsoft EA-skraýbing bazaryna 2021-nji ýylda 16 mlrd dollara Nuance Communications kompaniýasyny satyn alandan soň çykdy. Hut ol Dragon Medical One we DAX Copilot programmalaryny işläp taýýarlady.
Microsoft-yň maglumatlaryna görä, soňky bir aýda DAX Copilot programmasy 600 lukmançylyk edarasynda lukmanlaryň 3 milliondan gowrak kabul edişliginde ulanyldy.
