2050-nji ýyla çenli semizlik bütin dünýäde çynlakaý meselä öwrüler. «The Lancet» žurnalynda çap edilen täze seljerme, artykmaç agramy we semizligi bolan adamlaryň sanynyň düýpgöter köpeljekdigini çaklaýar diýip, «The Guardian» ýazýar.
Çaklamalara görä, geljek 25 ýylyň dowamynda 3,8 milliarddan gowrak uly ýaşly adamlar we 746 million çaga artykmaç agram bilen ýüzbe-ýüz bolar. Esasan-da ýaşlaryň arasynda semizligiň 121% artmagyna garaşylmagy uly alada döredýär.
Hünärmenler dessin çäreler görülmese, bu ýagdaýyň agyr netijelere getirmeginiň ähtimaldygyny duýdurýarlar: bu irki ölüme, dürli kesellere we saglygy goraýyş ulgamlaryna aşa ýüklenilmegine getirip biler.
Artykmaç agramly adamlaryň iň köp ýaşaýan ýerleri sekiz döwletdir: Hytaý, Hindistan, ABŞ, Braziliýa, Russiýa, Meksika, Indoneziýa we Müsür. Dünýäde semizlikden ejir çekýän uly adamlaryň ýarysyndan gowragy, hut şu ýurtlarda ýaşaýar.
Mundan başga-da, çaklamalara görä, 2050-nji ýyla çenli çaga semizliginiň iň ýokary derejesi Demirgazyk Afrikada, Ýakyn Gündogarda, Latyn Amerikasynda we Karib basseýninde jemlenjekdir.
