Russiýanyň Caviar kompaniýasy Samsung-yň flagman smartfonynyň ýörite dizaýnlanan täze görnüşini hödürledi. Eksklýuziw enjamlaryň hakyky muşdaklary üçin niýetlenen Galaxy S25 Ultra Viper modeli meşhur kino gahrymany Jon Uigiň şahsy ýaragyndan ylham alnyp döredildi.
Caviar-yň dizaýnerleri adaty flagman smartfony meşhur kinosaganyň stiline getirip, oňa özboluşly keşp berdiler. Smartfonyň korpusy awiasiýa titanyndan ýasalan we şar-gara PVD örtügi bilen örtülen. Bu diňe bir premium görnüşi bermän, eýsem enjamyň berkligini hem artdyrýar.
Smartfonyň iň özüne çekiji tarapy – 24 karat altyn bilen bezelen, sapança meňzeş dizaýnydyr. Her bir elementi ussatlyk bilen işlenip taýýarlanan smartfon, Uigiň ýaragynyň güýçli we takyk keşbini görkezýär.
Ýörite modifikasiýalar edilendigine garamazdan, smartfon asyl modeliň ähli tehniki aýratynlyklaryny saklap galýar.
Samsung Galaxy S25 Ultra Viper-iň bahasy 13 müň dollardan ýokary, bu bolsa ony dünýäniň iň gymmat smartfonlarynyň birine öwürýär. Caviar bu modelden diňe bir nusga öndürer we ony diňe aýratyn sargyt esasynda satyn alyp bolar.
Ýatlatsak, Caviar mundan ozal hem, hytaý mifologiýasyndaky aždarhalaryň hökümdary Sýuanlongyň güýjüni alamatlandyrýan Huawei Mate XT Black Dragon-y, «Beýik, Gazaply, Kanuny» atly iň gymmat iPhone 16 «Corona» kolleksiýasyny, şeýle-de çäksizligi we ebedi täzelenmäni alamatlandyrýan çäge sagatlary we ýylanlar bilen bezelen Samsung Galaxy S25 «Lunar Year» kolleksiýasyny hödürläpdi.
