Lýuks elektronika modifikasiýalary bilen tanalýan Caviar kompaniýasy Lunar Year atly täze kolleksiýasyny hödürledi. Ol Samsung Galaxy S25 Ultra flagman smartfonyna esaslanýar we Ýylan ýylynyň nyşanyna bagyşlanýar.
Kolleksiýanyň esasy modeli Ouroboros bolmak bilen, ol “çäksizligi we ebedi täzelenmäni alamatlandyryp, bir bölekden beýlekisine akýan” altyn bölejikleri öz içine alýan gurnalan çäge sagatlar bilen enjamlaşdyrylandyr. Sagat elde ýasalan we 999 probaly altyndan ýasalan uroborosyň (öz guýrugyny dişleýän ýylan) üç ölçegli şekili bilen üsti ýetirilýär.
Enjamyň bahasy 899 müň rubldan başlaýar (häzirki walýuta hümmetinde, takmynan, 9,160 dollar).
Ikinji wariant - Dark Ouroboros. Ol awiasiýa titany we gara uroboros ulanylyp döredildi. Bahasy 659 müň rubldan başlaýar (takmynan, 6 705 dollar).
Bu hatardaky modeller elde ýasalýar we çäkli mukdarda öndürilip, bu olary seýrek kolleksiýa obýektlerine öwürýär.
Kolleksiýanyň esasyna öwrülen Samsung Galaxy S25 Ultra 2025-nji ýylyň 22-nji ýanwarynda yglan edildi. Smartfon 6,9 dýuýmlyk Dynamic AMOLED 2X ekrany, Snapdragon 8 Elite for Galaxy prosessory we 200 MP esasy kamera bilen enjamlaşdyrylandyr.
Enjamyň esasy wersiýasy 1299 dollardan satylýar.
Bu hatarda Apple iPhone 16 Pro we Pro Max-a esaslanýan Infinity modeli hem bar, onda uroboros ýorunja ýapragy görnüşinde towlanyp, 999 probaly altyn bilen örtülendir. Bu görnüş, takmynan, 6 452 dollardan hödürlenýär.
