Häzirki wagtda “Tapmaça” multfilminiň üçünji bölümi işlenip taýýarlanýar. Bu barada ssenariýeçi Deýw Holsteýn The Direct neşirine beren söhbetdeşliginde aýtdy.
Ol taslamanyň üstünde işlenýändigini tassyklady we franşizanyň trilogiýanyň çäginden çykyp, geriminiň giňäp biljekdigini aýtdy.
Holsteýn: "Biz henizem ikinji filmiň üstünliginden lezzet alýarys. Bir döwür ("Tapmaçanyň") üçünji bölümiň hem peýda boljakdygyna şübhelenemok, dördünjiden altynja ýetip, ýedinji we sekizinjisi hem dörär diýip umyt edýärin” - diýdi.
“Tapmaça 2-niň” ssenariýesiniň şärikdeş awtory Raýliniň täze filminiň durmuşda öňküden üýtgeşik bir bölüme girip, sýužet üçin ter pikirleri açjakdygyny belledi. Holsteýn Şatlygyň ewolýusiýasyna aýratyn üns bermek isleýär.
“Siz her täze filmde oýnuň üýtgemegini isleýärsiňiz we her sikwelde oýnuň düýpgöter özgermegine garaşýarsyňyz. Raýliniň bu franşizanyň hereketlendiriji güýjüne öwrülendigi gaty gowy zat we onuň durmuşyndaky bu täze bap hakykatdanam wakany düýpgöter üýtgedýär. Siziň durmuşda isleýän zadyňyz üýtgeýär, siziň bolşuňyz hem üýtgeýär. Siziň özüňizi duýuşyňyz. Bilseňiz, bu ýazyjynyň nukdaýnazaryndan garaňda tolgundyryjy, ajaýyp bir zat döretmek üçin size täze pikirleri berýär" – diýip, ol gürrüň berdi.
Pixar we Disney entek “Tapmaça 3” barada resmi bildiriş etmediler. Birinji bölümi 2015-nji ýylda çykypdy we uly üstünlik gazanypdy. 2024-nji ýylyň sikweli bolsa, 2025-nji ýylyň fewral aýynda hytaýly “Neçža 2” özünden ozdurýança, taryhda iň köp girdeji gazanan multfilme öwrüldi.
