«Brutalist» (Бруталист) dramasynyň baş keşbini ýerine ýetiren meşhur aktýor Edrian Broudi iň gowy erkek keşbi üçin «Oskar» baýragyna mynasyp boldy. Amerikan kinematografiýa sungaty we ylymlar akademiýasynyň 97-nji baýrak gowşurylyş dabarasy Los-Anjelesde geçirildi.
Režissýor Bredi Korbetiň filmi wenger arhitektory Laslo Totuň durmuşyna esaslanýar. Ol 1947-nji ýylda aýaly bilen bilelikde Ýewropadan ABŞ-a göçýär. Köp wagt geçmänkä, ol uly bir taslamanyň üstünde işlemek üçin tabşyryk alýar. Emma ony uly üstünliklere eltjek bu taslama, şol bir wagtda, ondan agyr ýitgileri hem talap edýär.
Edrian Broudi üçin bu ikinji «Oskar» baýragy bolup durýar. Ilkinji gezek ol 2003-nji ýylda Roman Polanskiniň «Pianist» (Пианист) filmindäki keşbi üçin bu abraýly baýraga mynasyp bolupdy.
Şu ýylyň «Iň gowy erkek keşbi» nominasiýasyna dalaşgärleriň arasynda Timoti Şalame («Düýbünden nätanyş» / Боб Дилан: Никому не известный), Kolman Domingo («Sing-Sing» / Синг-Синг), Reýf Faýns («Konklaw» / Конклав) we Sebastian Sten («Şägirt: Trampyň ýokary göterilmegi» / Ученик. Восхождение Трампа) ýaly aktýorlar hem bardy.
«Iň gowy zenan keşbi» baýragyna bolsa 25 ýaşly aktrisa Maýki Medison mynasyp boldy. Ol bu baýragy Şon Beýkeriň «Anora» (Анора) dramasyndaky baş keşbi üçin aldy.
Bu nominasiýanyň ugrunda bäsleşen beýleki dalaşgärleriň arasynda Demi Mur («Substansiýa» / Субстанция), Fernanda Torres («Men henizem bärde» / Я все еще здесь), Karla Sofiýa Gaskon («Emiliýa Peres» / Эмилия Перес) we Sintia Eriwo («Zalym: Günbataryň jadygöýi barada erteki» / лая: Сказка о ведьме Запада) hem bardy.
