Latwiýanyň «Akym» (Поток) atly multfilmi «Iň gowy animasion film» nominasiýasy boýunça «Oskar» baýragyna mynasyp boldy. Režissýor Gint Zilbalodisiň döreden eseri Latwiýanyň kino taryhynda Amerikan kinematografiýa sungaty we ylymlar akademiýasy tarapyndan sylaglanan, ýagny «Oskar» baýragyny gazanan ilkinji film boldy.
Ýeňiş köp adam üçin garaşylmadyk boldy. Sebäbi bu kategoriýanyň ugrunda «Ýabany robot» (Дикий робот), «Tapmaça 2» (Головоломка 2), «Ulitkanyň memuarlary» (Мемуары улитки) we «Uolles we Gromit: Iň ýowuz ar» (Уоллес и Громмит: птичья месть) ýaly güýçli multifilmler hem bäsleşýärdi.
Şeýle-de «Akym» multifilmi «Iň gowy halkara film» diýen kategoriýada hem dalaşgär edilip görkezilip, «Men henizem bärde» (Я все еще здесь), «Iňňeli gyz» (Девушка с иглой), «Emiliýa Peres» (Эмилия Перес) we «Mukaddes injiriň tohumy» (Семя священного инжира) ýaly filmler bilen bäsleşdi. Bu nominasiýada bolsa, «Men henizem bärde» atly film ýeňiji boldy.
«Akym» doly metražly animasion filmi açyk kodly «Blender» atly 3D kompýuter grafika programmasynda döredildi. Režissýor Zilbalodis ony dört ýarym ýylyň dowamynda işläp taýýarlady. Filmiň sýužeti suw joşgunlarynyň bolan döwründe diri galmaga çalyşýan pişik hakda gürrüň berýär. Bu filmde hiç hili gepleşik (dialog) ýok.
«Akym» eýýämden birnäçe baýraklara, şol sanda «Altyn globus» baýragyna-da mynasyp bolupdy. Bu sylag hem Latwiýanyň kino taryhynda ilkinji gezek gowşurylypdy.
