Dünýä belli Fendi modalar öýi 26-njy fewralda Milanda 100 ýyllygyny dabaraly ýagdaýda belläp, özüniň täze kolleksiýasyny hödürledi. Bu kolleksiýa brendiň mirasyna goýlan hormaty we 2025-nji ýylyň häzirki moda trendlerini utgaşdyrýar diýip, «The Guardian» neşiri habar berýär.
Kolleksiýanyň esasy ünsi kürk (sütükli) önümlerine gönükdirildi. Kürkler Fendi brendiniň aýrylmaz bölegi bolmagynda galýar. Şonuň üçin brend Milandaky dükanlaryň birinde ýörite kürk tikin atelýesini açmagy meýilleşdirýär. Şeýle-de kürkden tikilen aksessuarlar we eşikler hem trend bolup, esasan-da wintaž kürkler, boa şarflar, sumkalar we kürk bilen bezegli ýeňil köýnekler uly isleg bilen kabul edilýär.
Täze kolleksiýa häzirki zaman trendleriň esasy ugurlaryny öz içine alýar. O-siluet (tegelek) görnüşli egin-eşikler 2025-nji ýylyň ahyryna çenli hem meşhurygyny ýitirmez. Indi diňe palto we žaketler däl, eýsem tegelek ýakaly köýnekler we bluzlar hem moda boldy. Şeýle-de midi görnüşdäki gode ýubkalar (aşak tarapy giňelýänler) täzeden moda girýär.
Fendi 2025/2026-njy ýyl güýz-gyş kolleksiýasynda-da ýubkaly kostýumlaryň meşhurlygyny gaýtadan tassyklaýar. Häzirki wagtda hem midi ýubkadan we žaketden ybarat sada toplumlar hem-de trikotaž longsliwler bilen has rahat görnüşler modada öňe çykýar. Esasy düzgün – dyza çenli bolan ýubkalary saýlamak, sebäbi olar stil hasap edilýär.
Fendi-niň kolleksiýasynyň reňk palitrasy solak öwüşgünleriň ulanylmagy bilen tapawutlanýar. Täzeden meşhur bolan bu reňkleriň arasynda esasan mustard (sary), ýaşyl, gülgüne reňkler we çalyň beýleki öwüşginleri bar.
