Awstraliýanyň Pickles marketpleýsiniň barlagçylary ulanyşdaky 250 töweregi elektrik ulagyny synagdan geçirdiler we olaryň batareýalarynyň 120 müň km geçenden soň, energiýa kuwwatynyň ortaça 90,1 göterimini saklaýandygyny anykladylar diýip, Autoevolution habar berýär.
Görnüşi ýaly, Hyundai-yň batareýalary Teslanyňka garanda, zaýalanmaga has az sezewar bolýan eken.
Geçen ýoly 120 müň km ýa-da ondanam köp bolan elektrikli awtoulaglarda synagçylar tarapyndan kesgitlenen ortaça energiýa kuwwatynyň görkezijisi zawodyň goýan görkezijisiniň 90,1% -ini düzdi. 40-80 müň km aralygynda 94,5%, takmynan 20 müň km ýol geçende bolsa 98,2%-digi hasaba alyndy. Elektrikli awtoulagyň ýaşyna baglylykda, batareýa iki ýaşly awtoulag üçin energiýa kuwwatynyň 97,2 göteriminden başlap, dört we ondan uly awtoulaglar üçin 93,7 göterime çenli saklaýar.
Synagdan geçirilen Tesla elektrik awtoulaglarynyň batareýalary ortaça 7,7% peseldi, bu görkeziji BYD üçin 1,4%, Hyundai üçin bolsa bary-ýogy 0,7% -dir.
Şeýle-de bolsa, barlagçylar bu tapawudyň synaglara gatnaşan hytaýly we koreýaly awtoulaglaryň deňeşdirilende täzedigi bilen baglanyşyklydygyny çaklaýarlar. Mysal üçin, synagdan geçirilen Teslanyň ortaça geçen aralygy 42,4 müň km, Hyundai-yňky bary-ýogy 29,2 müň km.
Batareýanyň zaýalanmagy elektrik ulagyny saýlamakda täsir edýän esasy faktor bolmagynda galýar. 2024-nji ýylyň dekabrynda Stenford uniwersitetiniň alymlary batareýanyň ömrüniň ozal pikir edilişinden 1,5 esse uzak bolup biljekdigini anykladylar.
