Microsoft 2025-nji ýylyň 5-nji maýyndan Skype messenjerini we wideojaň hyzmatyny ýapar. Bu barada hyzmatyň saýtynda habar berildi. Kompaniýa programmany goldamagyny bes edip, Teams hyzmatyna ünsi jemlär.
Mundan öň XDA Developers portalynyň okyjylarynyň biri Windows üçin Skype-yň täze beta wersiýasynda hyzmatyň ýapyljakdygy barada maglumatly setiriň peýda bolandygyny görüpdi.
“Maý aýyndan başlap Skype elýeterli bolmaz. Teams-de jaň etmegi we aragatnaşyk saklamagy dowam etdiriň” – diýlip, programmanyň täze wersiýasynyň kod böleginde aýdylýar. Eger ulanyjynyň Skype kontaktlarynda eýýäm bu hyzmatdan peýdalanýan adamlar bar bolsa, onda degişli habarnama peýda bolar.
Teams hyzmaty hem ulanyjylara Skype-daky ýaly bire-bir ýa-da toparlaýyn jaňlary amala aşyrmaga, habarlar bilen alyşmaga, faýllar bilen paýlaşmaga mümkinçilik berýär. Şeýle-de, Teams ýygnaklary geçirmek, senenamany dolandyrmak ýaly giňeldilen funksiýalary-da hödürleýär.
Kompaniýa ýakyn günlerde Skype ulanyjylaryna öz Skype akkauntlaryny ulanyp, islendik gurluşda Teams-e (mugt) girmäge mümkinçilik berjekdigini aýdýar. Skype akkaunty bilen Teams-e girilen ýagdaýynda, çatlar we kontaktlar awtomatik taýdan programmada peýda bolar.
Geçiş döwrüniň dowamynda Teams ulanyjylary Skype ulanyjylary bilen jaňlaşyp, habarlaşyp biler, Skype ulanyjylary hem Teams ulanyjylary bilen aragatnaşyk saklap biler.
Şeýle-de, ulanyjylar öz maglumatlaryny, çatlaryny, kontaktlaryny we jaň sanawyny Teams-e eksport edip biler.
Skype 2003-nji ýylda işe girizildi. Ol Şwesiýanyň Tele2 kompaniýasynyň öňki işgärleri Niklas Zennstrem bilen Ýanus Friisiň gatnaşmagynda estoniýaly işläp düzüjiler tarapyndan döredildi. 2011-nji ýylda hyzmat 8,5 mlrd dollara Microsoft tarapyndan satyn alyndy. 2019-njy ýylda korporasiýa Skype-yň biznes üçin işlemegini bes etjekdigini (ahyrynda bu 2021-nji ýylda boldy), guramalaryň bolsa Microsoft Teams-e geçmelidigini habar berdi.
