Floridada SpaceX kompaniýasynyň Falcon 9 raketa göterijisiniň uçuşy boldy. Ol Aýa Intuitive Machines kompaniýasynyň Nova-C Athena gonuş modulyny elter.
Modulyň 6-njy martda Aýdaky Muton dagynyň töwereginde gonmagy meýilleşdirilýär. Bu Ýeriň tebigy hemrasynda iň beýik dag bolmagy mümkin. Missiýa 10 gün töweregi dowam eder.
Onuň esasy wezipesi Aý çeşmelerini öwrenmekden ybarat. Enjam özi bilen kameralary, topragy burawlamak üçin enjamy, mass-spektrometri we Nokia 4G signal iberijisini elter. Bu Aýda öýjükli aragatnaşygy ýola goýmak üçin ilkinji ädim bolup biler.
Belläp geçsek, bu Intuitive Machines kompaniýasynyň ikinji Aý missiýasydyr. 2024-nji ýylyň fewral aýynda Odysseus moduly Malapert A krateriniň töwereginde gondy, ýöne söýeginiň döwülmegi sebäpli gyşaryp, gapdala ýykyldy. Onuň Gün panelleri doly zarýad alyp bilmedi we alty gün işländen soň, enjam “uky režimine” geçdi.
