Hytaýda Wan familiýaly bir erkek adam «Halka zyňmak» oýnundan bahasy 1,7 million ýuana (takmynan, 235 müň dollara) deň bolan Maserati awtoulagyny utdy. Adaty bolmadyk bu ýaryş Hytaýyň Henan welaýatynyň Şansýu şäherindäki gijeki bazarda geçirildi diýip, «South China Morning Post» neşiri habar berýär.
Bu oýunda gatnaşyjylar halkalary nyşana zyňyp, ony dürs urmaga çalyşýarlar. Ýaryşyň baýraklarynyň arasynda Maserati-den başga-da sygyrlar we goýunlar ýaly baýraklar hem bardy.
Wan halka satyn almak üçin 2 müň ýuan töläp, üç sagada golaý wagtyň dowamynda, takmynan, 8 müň gezek halka zyňdy.
«Men müňlerçe halka zyňdym, elim henizem birneme agyrýar. Ilkibaşda diňe synanyşýadym. Ýeňşim esasanam şans bilen baglymyka diýip pikir edýän» — diýip, Wan aýtdy. Ol basketbol oýnamagy halaýandygyny we gijeki bazarlarda ýygy-ýygydan ýeňiş gazanýandygyny hem belläp geçdi.
«Men köplenç bir zatlar utýaryn. Mysal üçin, Aý [Hytaý] täze ýylynda 150 ýuan sarp edip, alty sany gaz utupdym» — diýip, ýeňiji gürrüň berdi.
Şeýle-de bolsa, Wanyň utan Maserati-si onuň doly öz mülki däldir. Ol awtoulagy diňe bir ýyllap ulanmaga hukugy gazandy. Wan häzirki wagtda bu hukugy pula çalyşmak üçin dükanyň eýesi bilen gepleşik geçirýär.
