Hytaýyň Yushu Technology kompaniýasy gumanoid (adam şekilli) robot Yushu G1-iň kung-fu tilsimlerini ýerine ýetirýän wideosyny çap etdi. Utgaşyklylygy we çylşyrymly hereketlerdäki durnuklylygy sebäpli, ulanyjylar oňa «Kung Fu BOT» adyny berdiler.
Yushu G1-iň agramy 35 kg, boýy bolsa 127 sm. Iň ýokary burulma pursaty (torky) 120 N·m bolan 43 sany hereketlendiriji bogun bilen enjamlaşdyrylan. Onuň algoritmleri robota uýgunlaşmaga we öwrenmäge mümkinçilik berýär. Yushu G1-iň elleri adamlaryň hereketlerini gaýtalap, obýektleri dolandyryp bilýär, UnifoLM (Unitree Robot Unified Large Model) tehnologiýasy bolsa daş-töweregi bilen täsirleşmegine ýardam berýär.
«Indi ol islendik hereketi we islendik tälimi ýerine ýetirip bilýär» — diýip, işläp düzüjileri aýdýar.
Robot iki sagada çenli üznüksiz işläp bilýär. Ol 3D-LiDAR we çuňluk kameralary bilen enjamlaşdyrylan.
Kompaniýa emeli aňyň robot tehnikalarynyň ösüşindäki ähmiýeti barada aýratyn aýdyp geçýär.
«Emeli aň bilen tizleşdirilen robotehniki tehnologiýalar her gün kämilleşýär we ösýär» — diýip, Yushu Technology kompaniýasy belläp geçýär.
