Täjigistanda Merkezi Aziýa sebitindäki iň uzyn awtoulag köprüsi gurlar. Köpriniň uzynlygy 920 metr bolup, giriş ýollary bilen birlikde umumy uzynlygy 1500 metre ýetýär. Bu barada Täjigistanyň Ulag ministrliginiň metbugat gullugy habar berýär.
Köpriniň gurluşygy "Obigarm – Nurabad" awtoulag ýolunyň üçünji tapgyrynyň çäklerinde meýilleşdirilýär. Ol Nurabad etrabynyň çäginde Surhob derýasynyň iki kenaryny birleşdirer.
Täjigistanyň Ulag ministrligi bilen baglaşylan ylalaşyga laýyklykda, taslamany Hytaýyň Zhejiang Communications Construction Group Co., Ltd. döwlet korporasiýasy durmuşa geçirer. Taslama dört ýylyň içinde tamamlanar.
Taslamanyň umumy bahasy takmynan 427,5 million ýuana (takmynan 60 million dollar) deňdir.
Häzirki wagtda Merkezi Aziýada iň uzyn köpri hasaplanýan desga Gazagystanyň gündogarynda ýerleşýän we geçen ýylyň oktýabr aýynda açylan Buharmin köprüsidir. Onuň uzynlygy 1316 metr.
Zhejiang Communications Construction Group Co., Ltd. dünýäde has iri taslamalary amala aşyran kompaniýalaryň biri bolup, onuň eden işleriniň hatarynda 36 kilometr uzynlygyndaky Hangzhou aýlagynyň üstünden geçýän iň uzyn transokean köprüsi, şeýle-de Belgiýanyň Antwerp portundaky dünýäniň iň uly derwezeli geçelgesi ýaly taslamalar bar.
