ABŞ-nyň hökümetiniň iş netijeliligini ýokarlandyrmak boýunça edarasynyň (DOGE) ýolbaşçysy Ilon Mask supermilliarderleriň reýtinginde birinji orny eýeledi. Bu reýtinge bütin dünýä boýunça bary-ýogy 24 adam girýär diýip, Altrata analitiki kompaniýasynyň maglumatlaryna salgylanyp, The Wall Street Journal gazeti habar berýär.
Kompaniýa aşa baý adamlaryň täze kategoriýasynyň – supermilliarderleriň dörändigini we her biriniň baýlygy azyndan 50 mlrd dollar bolan adamlary bu kategoriýa degişli edip boljakdygyny belleýär. Şeýlelikde, Altrata supermilliarderleriň sanawynyň birinji ornunda Tesla, SpaceX we X kompaniýalarynyň ýolbaşçysy Ilon Masky ýerleşdirdi. Onuň baýlygy 419,4 mlrd dollara barabar. Onuň yzyndan Amazon onlaýn reteýleriniň esaslandyryjysy Jeff Bezos gelýär – 263,8 mlrd dollar. Üçünji orny 238,9 mlrd dollar bilen LVMH kompaniýalar toparynyň eýesi Bernar Arno jemledi.
Dördünji we bäşinji orunlarda, degişlilikde Oracle tehnologiýa kompaniýasynyň ýolbaşçysy Larri Ellison ($237 mlrd) we Meta korporasiýasynyň baş müdiri Mark Sukerberg ($220,8 mlrd) ýerleşdi.
Umuman, dünýäniň iň baý 24 adamynyň baýlygy 3,3 trln dollara barabar bolup, bu Fransiýanyň JIÖ-i bilen deňleşýär. Sanawdaky 16 adamyň baýlygy 100 mlrd dollardan geçýär. Eger XIX asyrda we XX asyryň başynda iň barly adamlar senagatçylar bolan bolsa, häzir supermilliarderleriň aglabasy öz kapitalyny tehnologiýa pudagynda gazandy.
