Microsoft korporasiýasy «Majorana 1» atly kwant çibiniň işlenip düzülendigini mälim etdi. Ol kwant kompýuterleriniň durnuklylygyny we netijeliligini ep-esli ýokarlandyryp biler. Majorana 1 kwant çibi adaty kwant kubitlerinden tapawutlylykda, has durnukly işleýän we daşky täsirlere duýgurlygy has az bolan topologiki kubitlerden peýdalanýar.
Adaty kubitler daşky gurşawyň täsirlerine garşy örän duýgur bolýar. Şol sebäpli olarda ýalňyşlyk döremek ähtimallygy hem ýokary bolýar. Topologiki kubitler bolsa başgaça prinsip esasynda işleýär. Olar 1937-nji ýylda teoretiki taýdan çaklanan Maýorana fermionlaryna esaslanýar.
Microsoft-a görä, täze tehnologiýa kwant kompýuterleriň has ygtybarly işlemegine kömek eder. Şeýle-de ýalňyşlyklary düzetmek prosesi ep-esli ýönekeýleşer. Eger çip, garaşylyşy ýaly, üstünlikli işlese, kwant hasaplamalary has çalt ýerine ýetiriler.
Korporasiýa geljekde birje çibe millionlarça topologiki kubiti ýerleşdirmegi maksat edinýär. Bu «häzirki wagtda» çözülmesi kyn bolan meseleleri aňsatlyk bilen çözüp biljek kwant kompýuterleriň işlenip düzülmeginde möhüm ädim bolar.
Emma bütin alymlar Microsoft-yň bu uly umytlaryna şübhe bilen garaýarlar. Sebäbi kompaniýa 2018-nji ýylda-da topologiki kubitleri döredendigini aýdypdy, ýöne şol wagt hem onuň netijeleri tassyklanmandy.
Microsoft täze çibiň hakykatdanam netijeli işleýändigini subut etmek üçin garaşsyz synaglaryň netijeleriniň hödürlenjekdigini wada berdi.
