24-25-nji fewralda Ankara şäherinde Ykdysady hyzmatdaşlyk boýunça Hökümetara türkmen-türk toparynyň sekizinji mejlisi geçirildi.
Türkmenistanyň DIM-niň habar bermegine görä, mejlisde türkmen wekiliýetine Türkmenistanyň wise-premýeri Nökerguly Atagulyýew, türk wekiliýetine bolsa Türkiýäniň wise-prezidenti Jewdet Ýylmaz ýolbaşçylyk etdi.
Toparyň mejlisiniň dowamynda Türkmenistanyň we Türkiýäniň degişli ministrlikleriniň hem-de pudak edaralarynyň ýolbaşçylary ykdysady görkezijiler bilen tanyşdylar, şeýle hem geçen döwürde iş meýilnamasynda göz öňünde tutulan çäreleriň durmuşa geçirilişini ara alyp maslahatlaşdylar.
Duşuşyga gatnaşyjylar iki ýurduň arasyndaky söwda dolanyşygynyň oňyn ösüşini bellediler. Energetika, söwda, maýa goýum, bank, ulag-logistika, şäher gurluşygy we oba hojalygy pudaklary hyzmatdaşlygyň ileri tutulýan ugurlary hökmünde kesgitlenildi.
Nebit-gaz pudagynda Türkmenistan bilen Türkiýäniň arasyndaky hyzmatdaşlygy ösdürmäge aýratyn üns berildi. Şu ýylyň dowamynda bilelikdäki işleriň çäginde mundan beýläkki ädimler bellenildi.
Şeýle hem ylym-bilim, saglygy goraýyş, syýahatçylyk we daşky gurşawy goramak ugurlaryndaky gatnaşyklary işjeňleşdirmegiň mümkinçiliklerine garaldy.
Toparyň mejlisiniň netijeleri boýunça Jemleýji teswirnama gol çekildi.
Duşuşygyň çäginde Türkmenistanyň wise-premýeri Nökerguly Atagulyýew bilen Türkiýe Respublikasynyň wise-prezidenti Jewdet Ýylmazyň arasynda ikitaraplaýyn duşuşyk geçirildi.
