Tesla Cybertruck elektrikli pikaby ABŞ-nyň Ýol hereketiniň howpsuzlygy milli administrasiýasynyň (NHTSA) iň ýokary netijesini (5 ýyldyzdan 5-si) alandan soň, Ilon Maskyň kompaniýasy bu ulagynyň kraş-synaglarynyň (ulagy dürli ýol-ulag hadysalarynda synag edip görmek) wideosyny paýlaşdy.
Cybertruck-yň berkligini ony sagatda 56 km tizlik bilen beton diwara urup barlap gördüler. Bu hili synag ulaglaryň howpsuzlygy barlananda adaty kadalar bolup durýar.
Ýiti burçlary hem-de polat korpusy bolan Cybertruck-yň adaty ulaglardan üýtgeşik daş görnüşi tankytçylaryň öň bu ulaga ynamsyz garamagyna sebäp bolýardy. Emma Tesla-nyň inženerleri ähli ýagdaýlary göz öňünde tutupdyrlar. Wideoda pikap ulagynyň öň tarapynyň diwara urşy görkezilýär. Ulag onuň öň böleginiň urgynyň esasy güýjüni özüne siňdirer ýaly edilip düzülipdir. Kuzowyň esasy bölegi, şol sanda kabina abat galýar. Polat karkas epilmeýär.
Diňe bir öň urgular boýunça däl, eýsem, maşyny agdaryp hem synag edip gördüler. Ulag togalansa-da, üçegine hiç zat bolmandyr.
Bu synaglar baryp, 2023-nji ýylda geçirilipdir, emma Tesla wideony NHTSA-nyň bahalandyrmasyndan soň paýlaşdy.
