Internetde 27-nji fewralda Hytaýda we 2-nji martda dünýä bazarynda resmi taýdan hödürlenjek Xiaomi 15 Ultra flagman smartfonynyň ähli aýratynlyklary we suraty peýda boldy. Täze enjam ýokary derejeli çip we täzelenen kameralar bilen enjamlaşdyryldy.
Xiaomi 15 Ultra-nyň esasy aýratynlyklary:
- ·Çipset: Qualcomm Snapdragon 8 Elite, täze nesliň flagman prosessory.
- ·Ekran: 3200 x 1440 piksel durulygy, 120 Gs täzelenme ýygylygy, 3200 kd/m2 çenli ýagtylygy we Shield Glass 2.0 goragy bolan 6,73 dýuýmlyk LTPO AMOLED.
- ·Akkumulýator: 90 Wt simli we 80 Wt simsiz zarýad beriş goldawy (hytaý wersiýasy üçin) bilen 5410 mA/sag.
- ·Kameralar: 50 MP esasy, 50 MP teleobýektiw, 200 MP periskopik, 50 MP ultra giňburçly kamera. Frontal kamera 32 MP.
Kompaniýa eýýäm Hytaýdaky Bilibili platformasynda bu smartfony gysgaça wideo synda görkezdi. 90 sekuntlyk wideoda gurluş üç wariantda, şol sanda Leica fotokameralaryndan ylham alan iki reňkli wariantda görkezilýär.
“Soňky 100 ýylda iň beýik kamera dizaýny” – diýip, Xiaomi smartfonyň arka paneliniň dizaýnyny suratlandyrdy, ähtimal, hut şu iki reňkli warianty göz öňünde tutan bolsa gerek. 100 ýyl mundan ozal smartfonlaryň ýokdugyny göz öňünde tutsaň, Xiaomi-niň bu smartfony klassyky fotoapparatlar bilen bir hatarda goýýandygy düşnükli bolýar.
Şeýle-de, wideo her bir smartfon örtüginiň teksturasyny aýdyň görmäge mümkinçilik berýär.
