Airbus awiagurluşyk kompaniýasy uçarlarynda iki gatly oturgyçlary ornaşdyrmak mümkinçiligini öwrendi, ýöne taslama birnäçe möhüm kynçylyklar bilen ýüzbe-ýüz boldy. Çäkli giňişlik, awiasiýadaky berk talaplar we goşmaça çykdajylar bu taslamany maksada laýyk etmeýär.
Iki gatly oturgyç pikiri ilkinji gezek 1948-nji ýylda peýda boldy. Ýakynda Ispaniýanyň Chaise Longue startapy bu pikire gaýdyp gelip, Airbus-a öz işläp taýýarlamalaryny teklip etdi. Emma bu teklibiň durmuşa geçirilmegi uly sorag astynda.
Esasy kynçylyklar, aýratyn-da, gysga we orta aralyk ugurlar üçin niýetlenen uçarlarda kabinanyň çäkli beýikligi bilen baglanyşyklydyr. Mundan başga-da, awiasiýada berk kadalar berjaý edilýär. Ýolagçylaryň ewakuasiýa düzgünleri şeýle çözgüdiň netijesiz bolmagyna getirýär, sebäbi adatdan daşary ýagdaýlarda tizlik hem ykjamlyk möhüm bolup durýar.
Galyberse-de, oturgyçlaryň köpelmegi uçaryň agramyna, ýangyç sarp edilişine we ekipaža düşýän ýüküň artmagyna täsir eder. Mundan başga-da, awiakompaniýalar hajathana we ekipaž agzalarynyň sany boýunça kadalary berjaý etmelidirler.
Netijede, uçaryň içki gurluşyny üýtgetmek pikiri çylşyrymly hem aşa gymmat taslama bolup görünýär.
Aşaky gatdaky oturgyçlaryň ýolagçylara aýaklaryny uzatmagy üçin giňişlik berip bilmek mümkinçiligine garamazdan, iki gatly oturgyçlar häzirlikçe durmuşa geçirilmegi mümkin bolmadyk konsepsiýa bolmagynda galýar.
