ABŞ-da Stiw Jobsy täze bir dollarlyk teňňede ebedileşdirmek mümkinçiligi gözden geçirilýär. Bu teklibi Kaliforniýanyň gubernatory Gewin Nýusom öňe sürüp, Apple bilen Pixar-y esaslandyryjynyň dünýä innowasiýalaryna goşan goşandyny belledi.
Jobsy “Amerikan innowasiýalary” seriýasynyň bir dollarlyk teňňesinde şekillendirmek isleýärler. Bu seriýa 2018-nji ýyldan bäri ABŞ-nyň Zikgehanasynyň her bir ştata öz teňňesini döretmäge mümkinçilik berýän maksatnamasynyň çäklerinde çykarylýar. Teňňeler görnükli oýlap tapyjylara we täzelikçilere, şeýle-de olaryň üstünliklerine bagyşlanyp bilner.
Gubernatoryň pikiriçe, Jobs Kaliforniýanyň innowasion ruhuny ideal derejede görkezýär. Apple-iň esaslandyryjysy kompýuterleri hemmeler üçin elýeterli eden adam hökmünde tanalýar. Apple II öýde ulanmak üçin ilkinji şahsy kompýuter boldy, Macintosh bolsa düşnükli interfeýsiniň netijesinde kompýuter bilen işleşmegi aňsatlaşdyrdy.
Jobs tehnologiýany adaty adamlar üçin ýönekeý we amatly etmäge çalyşdy. Bu çemeleşmäniň netijesi sanly dünýäni üýtgeden iPod, iPhone we iPad gurluşlary boldy.
Jobs tarapyndan döredilen Pixar studiýasy doly derejede kompýuterde taýýarlanan ilkinji filmi – “Oýnawaçlaryň hekaýatyny” (История игрушек) çykardy.
Häzirki wagtda gubernator Nýusomyň teklibi ýörite komitet tarapyndan gözden geçirilýär. Deslapky dizaýn Jobsy gara switerde we äýnekde şekillendirmegi göz öňünde tutýar, ýöne bu gutarnykly wariant däl.
Teňňeleriň çykarylmagy 2026-njy ýyla meýilleşdirilýär.
