«Counterpoint» analitik kompaniýasynyň hasabatyna görä, Huawei kompaniýasy Hytaýyň eplenýän smartfon bazaryndaky agalygyny berkitdi we 2024-nji ýylda bu pudakdaky ähli satuwlaryň ýarysyna eýe boldy diýip, «GSMArena» habar berýär.
Huawei-niň iň meşhur modelleri «kitap görnüşli» smartfonlaryň arasynda Mate X5 we X6, «gapjyk görnüşli» telefonlaryň arasynda bolsa Pocket 2 we Nova Flip boldy.
Bazar paýy 10%-den ýokary bolan beýleki kompaniýa bolsa Honor boldy. Brendiň üstünligi inçe we ýeňil dizaýny bilen tapawutlanýan Magic Vs 2 we Magic Vs 3 modelleriniň ýokary satuwy bilen baglanyşykly. Beýleki hytaý brendleri, şol sanda Samsung-yň bazar paýy hem 10%-den az boldy.
2024-nji ýylda iň köp satylan bäş sany eplenýän smartfon ähli satuwlaryň 50%-den gowragyny emele getirdi. Bu sanawy Huawei-niň iki, Honor-yň iki we Vivo-nyň bir modeli düzýär.
Häzirki zaman eplenýän enjamlar has inçe we ýeňil bolup, has uzak ömürli batareýalara we kämilleşdirilen kameralara eýe boldular. Mysal üçin, Oppo-nyň şu hepde tanyşdyran Find N5 modeli eplenen ýagdaýyndaky bary-ýogy 8,93 mm galyňlygy bilen bazardaky iň inçe «kitap görnüşli» eplenýän smartfon boldy.
Eplenýän smartfonlar häzirki wagtda Hytaýyň umumy smartfon bazarynyň takmynan, 3%-ini emele getirýän bolsa-da, olaryň meşhurlygy barha artýar.
