Shimane Fujitsu kompaniýasynyň Fujitsu Client Computing önümçilik bölüminiň öndüren kompýuterleriniň sany 50 milliona ýetdi. Bu mynasybetli kompaniýa ýeke-täk nusgada kumiko usuly bilen haşamlanan agaç gapakly FMV Note C ultrabugyny çykardy. Bu barada IT Media habar berýär.
Kumiko takmynan 1500 ýyl mundan ozal Ýaponiýada dörän sungatdyr. Munda çylşyrymly nagyşlary döretmek üçin kiçijek agaç bölejikleri ulanylýar.
Noutbugyň gapagynda agajyň dört görnüşinden ýasalan 5800 element bar. Bu dizaýn ussat Funaki Kiýesi tarapyndan ýerine ýetirildi. Ol munuň üçin 2-3 aý sarp etdi.
Dizaýnyň esasy aýratynlygy, gapagyň gaty galyň bolup bilmezligindedir. Şonuň üçin, her agaç bölejiginiň galyňlygy 4 mm-den geçmän, olaryň hersiniň üstünde seresaplyk bilen işlendi. Mundan başga-da, noutbugyň S, F we J düwmelerinde agaç örtükleri bar, bu harplar Shimane Fujitsu Japan-yň gysga görnüşini alamatlandyrýar.
Şimane Fujitsu 30 ýyldan gowrak wagt bäri şahsy kompýuterleri öndürýär. Bu noutbuk kompaniýanyň ilkinji ýadygärlik noutbugy däldir. Şuňa meňzeş model kompaniýanyň öndüren kompýuterleriniň sany 40 milliona ýetenden soň hem çykarylypdy.
